Liliana Benveniste  – Cd Ayres Buenos

LETRAS
Ladino
 Grafía según Akí Yerushalayim

1. AVRE ESTE ABAJOUR

Avre este abajour biju
Avre la tu ventana
Por ver tu kara morena
Al Dió daré mi alma

Por la tu puerta yo pasí
Yo la topí serrada
La yave dura yo bezí
Komo bezar tu kara

Si tu de mi t’olvidaras
Tu ermozura piedras
Ningun ninyoo t’endenyará
En los mis brasos mueras.

___________________

2. ARVOLES YORAN POR YUVIAS

Arvoles yoran por yuvias
I montanyas por ayres
Ansí yoran los mis ojos
Por ti kerida amante
Torno i digo que va a ser de mí
En tierras ayenas yo me vo morir

Enfrente de mí ay un anjelo
Kon tus ojos me mira
Yorar kero i no puedo
Mi korazon suspira
Torno i digo …

Blanka sos, blanka vistes
Blanka es la tu figura
Blankas flores kaen de ti
De la tu ermozura
Torno i digo …

Ven, veras, ven, veras
Ven, veras, veremos
En l’amor ke mos tenemos
Ven mos aunaremos
Torno i digo …

Desazer kero una kondja (rosa)
I azerme un vestido
Para irme a pasear
Djuntos kon ti kerido.
Torno i digo …

Yuvia izo i se mojo
La kaye i el kortijo
Anda dezilde al mi amor
Ke es de los ojos mios
Torno i digo …

___________________

3. NOVIA DE LA KARA BLANKA

Novia de la kara blanka
Blanko tengas tu mazal
Vente konmigo a mi kasa
Te pondré rosho y jaljal

Ke arrelumbre la novia
Komo kuando sale el sol
Su mazal blanko arrelumbre
Delante de todo el kahal

La novia vente a mi lado
gozaras ansia y kuidado
Kovraras un buen marido
Pedrerás ansia i sospiro

Novia de la kara blanka
Blanko tengas tu mazal
La novia vente a mi lado
Kedaras a buen velado (2)

___________________

4. AVRE TU PUERTA SERRADA

Avre tu puerta serrada
Ke en tu balkon luz no ay
El amor a ti te vela
Partamos roza
Partamos de akí

Yo demandí de la tu ermozura
Komo te la dio el Dio
La ermozura tuya es pura
La merezco solo yo

___________________

5. NO ME PUSO MI MADRE KOZA NINGUNA

No me puso mi madre koza ninguna (2)
La kara de la novia komo la luna
La onza de la grasia i a komo la vendere? (2)

Ni la vendo por onza ni por kuarterón (2)
Se la doy a mi amado de mi korasón
La onza de la grasia i a komo la vendere? (2)

No me puso mi madre ni albayalde¹(2)
La kara de la novia komo el esmalte
La onza de la grasia i a komo la vendere? (2)

Ni la vendo por onza ni por kuarterón (2)
Se la doy a mi amado de mi korasón
La onza de la gracia i a komo la vendere? (2)

 

¹Pigmento que mezclado con miel utilizaban las cortesanas griegas como mascarilla para el rostro

___________________

6. LA PRIMA VEZ

La  prima vez ke te vidí
De tus ojos me’namorí
D’akel momento te amí
Fina la tomba te amaré.

Aserkaté mi kerida
Salvadora de mi vida
Deskuvrité i avlamé
Sekretos de la tu vida.

___________________

7. UNA TARDE DE VERANO

Una tarde de verano
Pasí por la morería
I vi una mora lavando
Al pie de una fuente fria

Yo le dishe mora linda
Yo le dishe mora beya
Desha bever mis kavayos
D’estas aguas kristalinas

-No soy mora, el kavayero
ke soy de Espanya nasida
Me kautivaron los moros
Dia de Pascua florida

Si keres venir konmigo
A Espanya te yevaría
-I la ropa, el kavayero
Donde yo la desharia?

Lo ke es de seda i grana
En mis kabayos se iria
I lo que no vale nada
Por el rio tornaria

Al yegar akeyos kampos
La ninya yora i sospira
Porke yoras niya beya?
Porke yoras ninya linda?

-Yoro porke en estos kampos
Mi padre a kazar venia
Kon mi ermanito Aleksandro
I toda su kompania

-Avrid puertas i ventanas
Balkones i galerias
Ke por trayer a una espoza
Os traygo a una ermana mia!

___________________

8. LA SERENA

En la mar ay una torre
En la torre una ventana
En la ventana ay una ninyia
Ke a los marineros yama

Dame la mano palomba
Para suvir yo a tu nido
Maldicha ke durmes sola
Vengo yo a durmir kontigo

Si la mar era de leche
Los varkitos de kanela
Yo me mancharia entero
Por salvar la tu bandiera

Si la mar era de leche
Yo m’aria un peshkador
Peshkaria tus dolores
Kon palavrikas de amor.

___________________

9. SKALERIKA DE ORO

Skalerika de oro, de oro i de marfil
Para ke suva la novia a dar kidushín
Vinimos a ver, vinimos a ver
Ke logren i gozen i tengan mucho bien

La novia no tiene ducados(2)
Ke mos tenga un mazal alto (2)
Vinimos a ver, vinimos a ver
Ke logren i gozen i tengan mucho bien

Skalerika de oro, de oro i de perla
Para ke suva el novio a dar berahá
Vinimos a ver, vinimos a ver
Ke logren i gozen i tengan mucho bien

El novio no kere dinero (2)
Ke mos tenga un mazal bueno (2)
Vinimos a ver, vinimos a ver
Ke logren i gozen i tengan mucho bien

-.-.-.-.-.-

Skalerika de oro, de oro i de marfil
Para ke suvan los novios a dar kidushín

___________________

10. ENTRE LAS GUERTAS PASEANDO

Entre las guertas paseando
Entre el yasmin
Vide una ija muy ermoza
Enfrente de mí

Eya es ermoza
i muy grasioza
Ke me izo tresalir

Yo m’aserki al lado d’eya
La vide yorando
Las lagrimas sovre sus ojos
Perlas briylando

Le dishe: “Ke tienes,
Ke te konsientes,
¿Ken te izo sufrir?”

-Yoro por un manseviko
Ke por él me muero yo
Dia i noche ‘sto yorando
Al Dio esklamando:

“O Dio mio,
I piadozo,
¡Eskapame d’este amor!”

___________________

11. A LA UNA YO NASÍ

A la una yo nasí
A las dos me engrandesí
A las tres tomí un amante
A las cuatro me kasí

Alma, vida i korasón
Me kasí kon un amor

Dime ninya de’onde vienes
Ke te kiero konoser
I si no tienes amante
Yo te aré defender

Alma, vida i korasón
Yo te aré defender

Yendome para la gerra
Dos bezos al ayre dí
El uno es para mi madre
El otro es para tí

Alma, vida i korasón
El otro es para ti

A la una yo nasí
A las dos me engrandesí
A las tres tomí un amante
A las cuatro me kasí

Alma, vida i korasón
Me kasí kon un amor

___________________

12. MES DE MAYO

Mes de mayo, mes de mayo
Kuando las fuertes kalores
Kuando los toritos bravos
Los kavayos korredores

Kuando la sebada siegan
I el trigo prende kolores
Kuando los enamorados
Regalan a sus amores

Unos les regalan lirios
I otros les regalan flores
Pero yo triste de mí
Me enkuentro en estas prisiones

Ke no se kuando es de día
I no se kuando es de noche
Sino es por un pashariko
Ke kanta desde la torre.

Mes de mayo, mes de mayo
Kuando las fuertes kalores
Kuando los enamorados…
Regalan… a sus amores

___________________

13. ARVOLIKOS D’ALMENDRA

Arvolikos d’almendra ke yo plantí
Por los tus ojos vedrolis
Se incheron mis ombros i los mis brasos
En los tuyos entresados

Ke yo por tí, ke yo por tí
Ke yo por tí me muero yo

La puerta de mi kerida ya se avrio
De lagrimas ya se inchó
Komo la primavera ke ansí salió
La beya ninya ke amo yo

Ke yo por tí, ke yo por tí
Ke yo por tí me muero yo

Ermoza sos en kantida pa mi, kerida
a ti dezeo alkanzar
Si a tí no te alkanzi, mi kerida
mi vida yo te vo a empresentar.

Ke yo por tí, ke yo por tí
Ke yo por tí me muero yo

___________________

14. IRME KERO MADRE A YERUSHALAIM

Irme kero madre a Yerushalaim
A pizar las yervas i artarme d’eyas
En Él me arrimo yo
En Él m’afiguro yo
Él es Senyor de todo’l mundo

A Yerushalaim lo veo d’enfrente
Olvido ahi mis iyos i mis parientes
En Él me arrimo yo
En Él m’afiguro yo
Él es Senior de todo’l mundo

A Yerushalaim…

___________________

15. ADIO, KERIDA

Tu madre kuando te pario
I te kito al mundo
Korason eya no te dio
Para amar segundo

Adío, adío kerida
No kero la vida
Me l’amargates tu

Va bushkate otro amor
Aharva otras puertas
Aspera otro ardor
Ke para mi sos muerta

Adío, adío kerida
No kero la vida
Me l’amargates tu